O obxectivo final é conseguir que o concello sexa o principal centro de astronomía de galicia
O paso do asteroide 3122 Florence polo punto máis próximo á Terra levou a 40 persoas ata o miradoiro estelar As Tablillas (1.520 metros de altitude), na Veiga. O grupo formárono afeccionados á Astronomía chegados desde moi distintos lugares: A Coruña, Ferrol, Viana, O Barco, Madrid, Sevilla, Zamora ou do propio concello anfitrión. A súa presenza nunha observación guiada que foi programada poucas horas antes mostra o interese que xa esperta a actividade que fomenta un Concello que pode presumir da certificación Destino Starlight.
A técnico de Turismo, Mar Giraldo Martínez, explicou que algúns turistas xa estaban no Concello cando o Concello que dirixe Juan Anta Rodríguez e o divulgador e astrofotógrafo Óscar Branco Varela organizaron a observación guiada. Pero outros non. Boa parte dos visitantes puxéronse en marcha cara ás estribaciones de Trevinca en canto coñeceron o que aquí se preparaba.
Cada vez son máis os visitantes que acoden atraídos por unha afección, a Astronomía, cuxos custos non difiren excesivamente dos que soportan quen prefire o golf ou o surf. Un equipo de 1.000 euros, que inclúe telescopio, cámara fotográfica e fundas, xa permite realizar boas observacións. Explicouno Óscar Branco, un divulgador astronómico que goza atopando obxectos orbitando ao redor do Sol. "Non hai dúas noites que sexan iguais e ver os obxectos non é habitual", expuxo.
Reside na Coruña, pero xa é un veciño máis da Veiga. Aválano os 12 anos que leva frecuentando o Concello e observando o seu ceo. Esta experiencia permítelle apostar forte polo firmamento veigués, resolvendo posibles debates cunha aseveración: "É o mellor sitio para observar o ceo de Galicia". A escuridade do ceo, a escasa contaminación lumínica, a súa atmosfera limpa, o baixo nivel de contaminación e unha climatoloxía benigna son argumentos rotundos que sosteñen este liderado.
Con todo a favor, sería ata censurable deixar pasar a oportunidade de converter A Veiga no principal centro de Astronomía de Galicia. Sábeno Óscar Branco e Mar Giraldo, e nesta dirección centran boa parte do seu labor. "Pretendemos que se desenvolvan actividades serias", dixo o astrofotógrafo.